Azərbaycan animasiyası Qazaxıstanın Almatı Animasiya Festivalında

26-28 iyul tarixlərində Qazaxıstanın Almatı şəhərində 2-ci Almatı Animasiya Festivalı (Almaty Animation Festival) keçirilib. Azərbaycan Animasiya Assosiasiyasının sədri Rəşid Ağamalıyev və Assosiasiyanın üzvü Nəzrin Ağamalıyeva festivalda iştirak ediblər.

İyulun 26-da açılış mərasimi zamanı festivalın direktoru Anita Chernykh, proqram direktoru Ivan Ardashov və təsisçisi Anuar Kenzhibayev qonaqları salamlayaraq tədbiri açıq elan ediblər. Bundan sonra müsabiqə proqramı üzrə “Ən yaxşı tələbə animasiya filmi” kateqoriyasına daxil olan filmlər nümayiş etdirilib.

Üç gün davam edən festivalda yerli, xarici və Orta Asiya dövlətlərinin filmləri nümayiş etdirilib, ustad dərsləri təşkil olunub.

Festival çərçivəsində 2023-cü ildə Almatı Animasiya Festivalının “Ən yaxşı vizual həll” mükafatı alan “Hədis” animasiya filminin müəllifi Nəzrin Ağamalıyeva ustad dərsi keçib. Ustad dərsindən sonra “Hədis” animasiya filmi yenidən nümayiş olunub.

İyulun 28-də, festivalın bağlanış mərasimində beynəlxalq münasiflər heyətinin sədri Rəşid Ağamalıyev və münsiflər heyətinin üzvləri Anna Popova, Chyngiz Asanaliev və Almaz Kosobaev qalibləri elan ediblər:

• “Ən yaxşı Mərkəzi Asiya və MDB Animasiyası” kateqoriyasında “Syppyt suruktar” (“İtmiş məktublar”). Kyhynngy Oyuur
• “Ən yaxşı sənədli animasiya” kateqoriyasında “The Waiting” (“Gözlənti”). Voker Schlecht
• “Ən yaxşı tələbə animasiya” kateqoriyasında “Chosen’t” (“Seçilmiş”). Yotam Goren
• “Ən yaxşı beynəlxalq animasiya” kateqoriyasında “The Three Sisters” (“Üç bacı”). Timur Kognov
• “Ən yaxşı eksperimental animasiya” kateqoriyasında “Simple Forms” (“Sadə formalar”). Natalia Ryss
• “Ən yaxşı animasiyalı musiqi videosu” kateqoriyasında “Ninety One – Synbaim” (“Doxsan bir – Sınbaim”). Amal’ Temerbayev
• Münsiflər heyətinin xüsusi mükafatına – “SHITV.Spy”. Askar Urmanov
• Münsiflər heyətinin xüsusi mükafatına – “Wait For Me In a Dream” (“Yuxuda gözlə məni”). Natalia Durszewicz layiq görülüb.