Animasiya rejissoru Gennadi Tişşenko vəfat edib

Animasiya rejissoru Gennadi Tişşenko 20 iyul 2024-cü il tarixində vəfat edib. Bu barədə onun oğlu Roman Tişşenko məlumat verib. Allah rəhmət eləsin!

Tanınmış rejissor, yazıçı-fantast və ssenarist, rəssam və animator Gennadi Tişşenko 14 iyul 1948-ci ildə Bakıda dünyaya gəlib. Azərbaycan kinostudiyası nəzdindəki animasiya rəssamı kurslarında (1966-1968), Azərbaycan İnşaat Mühəndisləri İnstitutunun Memarlıq fakültəsində (1974-1979), Ali rejissorluq və ssenarist kurslarında (peşə animasiya rejissoru) (1982-1984) təhsil alıb. “Azərbaycanfilm” kinostudiyasında (1976-1988), “Multtelefilm” studiyasında (1988-2000, Rusiya) çalışıb.

Bir neçə nəsil onun əsərlərinə baxaraq böyüyüb. XX əsrin 60-70-ci illərində onun fantastik janrda çəkdiyi illüstrasiyalar sovet dövrünün məşhur “Техника молодёжи” jurnalının oxucularına böyük təsir göstərib. 80-90-cı illərdə bu oxucuların övladları rejissor Tişşenkonun animasiya filmlərini heyranlıqla izləyirdilər.

2000-2020-ci illər ərzində Gennadi Tişşenkonun bir sıra fərdi sərgiləri keçirilib, burada müəllifin təsviri sənətdə yeni istiqamət olan, Qərb mədəniyyəti və Şərqin mənəvi-mistik ənənələrini ətraf aləmin dərkinin intellektual-rasional yolunda birləşdirən “avatarizm” cərəyanını əks etdirən əsərləri nümayiş olunub.

Filmoqrafiya (Azərbaycanda çəkilən filmlər):

• “Qərib cinlər diyarında” (1977-ci il, tammetrajlı bədii film) – dekor rəssamı
• “Qayınana” (1978-ci il, tammetrajlı bədii film) – quraşdırılmış səhnələrin rəssamı
• “Qəribə adam” (1979-cu il, tammetrajlı bədii film) – quraşdırılmış səhnələrin rəssamı
• “Şirniyyat mübtəlası” (1979-ci il, qısametrajlı bədii film) – rejissor, quraşdırılmış səhnələrin rəssamı
• “Anın quruluşu” (1980-ci il, tammetrajlı bədii film) – quraşdırılmış səhnələrin rəssamı
• “Gözlə məni” (1980-ci il, tammetrajlı bədii film) – quraşdırılmış səhnələrin rəssamı
• “Əlavə iz” (1981-ci il, tammetrajlı bədii film) – quraşdırılmış səhnələrin rəssamı
• “Əzablı yollar” (1982-ci il, tammetrajlı bədii film) – quraşdırılmış səhnələrin rəssamı
• “Sakit İyonun gündəliyindən” (1985-ci il, animasiya filmi) – rejissor, ssenari müəllifi, rəssam, animator
• “Talada ev” (1986-cı il, animasiya filmi) – animator
• “Əks-səda doğuracaq” (1987-ci il, animasiya filmi) – rejissor, ssenari müəllifi, rəssam, animator

Mənbələr:

Gennadi Tişşenkonun oğlu Roman Gennadiyeviç Tişşenko

www.cosmatica.com – https://cosmatica.org/news/1914-vstal-v-vechnyi-stroi-gennadii-ivanovich-tischenko.html

Azərbaycan Animasiya Assosiasiyanın mətbuat xidməti

27.10.2024-cü il

Gennadi Tişşenko ilə müsahibə

2018-ci ildə dərc olunan “Azərbaycan animasiyası” kitabında Gennadi Tişşenko ilə geniş müsahibə yer alıb. Həmin müsahibəni təqdim edirik:

“Azerbaycan animasiyasi” kitabi – Gennadi Tişşenko ilə müsahibə