Azərbaycan Animasiya Assosiasiyası adından açıq məktub

01/04/2025

Baxış sayı: 605

Azərbaycan Animasiya Assosiasiyası adından açıq məktub

Azərbaycan Respublikasının mədəniyyət naziri

cənab Adil Kərimliyə

Azərbaycan Respublikasının Kino Agentliyinin (ARKA)

baş direktoru vəzifəsini icra edən cənab Orxan Sadıqova

Hörmətli Adil müəllim, hörmətli Orxan müəllim,

“Azərbaycan Animasiya Assosiasiyası” ictimai birliyinin əsas məqsədi – Azərbaycanda milli animasiya kino sənətinin inkişafına yardım etməkdir. 2016-2018-ci illər ərzində “Azərbaycan animasiyası” kitabı üzərində çalışmışıq, 2018-ci ildə ANİMAFİLM Beynəlxalq Animasiya Festivalını təsis eləmişik. Festival yaradılan gündən Mədəniyyət Nazirliyi, 2023-cü ildən isə ARKA ilə əməkdaşlıq edirik. 2024-cü ildə Mədəniyyət Nazirliyi və ARKA-nın dəstəyi ilə 7-ci ANİMAFİLM Beynəlxalq Animasiya Festivalı baş tutub və Britaniya Kino və Televiziya Sənətləri Akademiyası tərəfindən “BAFTA Festivallar Siyahısı”na daxil edilib.

Mədəniyyət Nazirliyi və ARKA-nın 2024-cü il üzrə fəaliyyətində animasiya sahəsində bir çox müsbət meyilləri müşahidə edirik. Məsələn, 2024-cü ildə Mədəniyyət Nazirliyi və ARKA-nın maliyyyə dəstəyi ilə bir qısametrajlı animasiya filmi (“Narqız”) və bir qısametrajlı sənədli-animasiya filmi (“Kapitan və Xəzər dənizi”) çəkilib, “Nağıl istəyirəm!” adlı qısametrajlı animasiya filminə isə maliyyə dəstəyinin göstərilməsi haqqında qərar verilib. 2024-cü ildə Mədəniyyət Nazirliyi və ARKA-nın dəstəyi ilə 7-ci ANİMAFİLM Beynəlxalq Animasiya Festivalı baş tutub. 2024-2025-ci illərdə Mədəniyyət Nazirliyinin dəstəyi ilə “ANİMAFİLM Lənkəranda” və “ANİMAFİLM Gəncədə” festivalları keçirilib. 2024-2025-ci illərdə Mədəniyyət Nazirliyi tərəfindən “Animatorların inkişaf proqramı” təşkil olunub. 2024-cü ildə həmçinin Mədəniyyət Nazirliyinin dəstəyi ilə Azərbaycan animasiyası bir neçə yerli və beynəlxalq platformalarda təmsil olunub – regionlarda “Yaradıcı müzakirələr” layihəsi, Bakıda “GameSummit”, Fransada Annecy Beynəlxalq Animasiya Filmləri Festivalı, Bakıda Baku Cinema Breeze (BCB) festivalı, Bakıda Türk Dünyası Animasiyası Beynəlxalq Festivalı (ATA Festival), Şuşada “Yaradıcılıq marafonu” layihəsi, Bakıda “Prodüserlərin inkişaf təlimi” və s. Bütün bu pozitiv amilləri yüksək qiymətləndiririk!

2024-cü ildə Azərbaycan Animasiya Assosiasiyası bir çox önəmli layihələŕə dəstək vermişdir və iştirak etmişdir. Təşkilatımızın fəaliyyəti ilə tanış olmaq üçün sizi “2024-cü ildə Azərbaycan Animasiya Assosiasiyasının fəaliyyəti və önəmli hadisələr haqqında” hesabat sənədinə nəzər salmağa dəvət edirik.

Hörmətli Adil müəllim, hörmətli Orxan müəllim,

Bu məktubla Sizə iki vacib məsələ ilə müraciət edirik.

Birinci məsələ – Animasiya evi

2025-ci ildə Azərbaycan Animasiya Assosiasiyasının fəaliyyətini təmin etmək məqsədi ilə “İçərişəhər” metrosuna yaxın ofis icarəyə götürdük və məkanı “Animasiya evi” adlandırdıq. Bu məkan Assosiasiyanın bütün üzvlərinə açıqdır (hazırda Assosiasiyada 46 üzv var) və orada müxtəlif təlimlər, film nümayişləri, təqdimatlar, ustad dərsləri keçirmək, animasiya üzrə ixtisaslaşan peşəkarlara və studiyalara məkan və avadanlıq dəstəyi vermək niyyətindəyik. Məkanı öz gücümüzlə və üzvlərin maddi və qeyri-maddi dəstəyi ilə təmir etdik və mebel aldıq. Fevral ayında British Council-in dəstəyi ilə Animasiya Evində İngiltərənin tanınmış animasiya prodüseri Aaron Wood-un ustad dərslərini təşkil etmişik. Mart ayında isə Azərbaycan animasiya filmlərinin nümayişlərini, həmçinin Qırğızıstan animatoru Çingiz Asanaliyevin ustad dərsini təşkil etmişik.

2025-ci il, martın 23-də Azərbaycan Animasiya Assosiasiyasının təşkilatçılığı ilə Animasiya Evində “İntensiv 2D animasiya kursu” başlayıb. Kursa 45 müraciət daxil olub, onlardan 18 tələbə kursa seçilmişdir. Kurs bir ay davam edəcək və dərslər həftədə altı dəfə olmaqla keçiriləcək. Kursun sonunda ən bacarıqlı tələbələri yeni animasiya filmlərinin istehsalına cəlb etmək və onları işlə təmin etmək niyyətindəyik. Məqsədimiz animasiya sahəsində peşəkar kadrların sayını artırmaqdır, bu isə öz növbəsində daha çox filmlərin çəkilməsinə yardım edəcəkdir.

Daha çox animasiya filmləri istehsal etmək üçün, yeni keyfiyyətli layihələrə böyük ehtiyac var. Bizdə olan məlumata görə, Mədəniyyət Nazirliyi və ARKA-nın təşkil etdiyi 2023-cü ilin istehsal müsabiqəsində 10 animasiya layihəsi, 2025-ci ildə post-prodakşn müsabiqəsinə 5 animasiya layihəsi, 2024-cü ildə post-prodakşn müsabiqəsinə isə heç bir layihə təqdim olunmayıb. Azərbaycan Animasiya Assosiasiyası yeni animasiya layihələrinin sayını artırmaq məqsədi ilə Animasiya evində yerli və xarici mentorların iştirakı ilə yeni animasiya layihələrinin inkişafı üzrə kurs təşkil etmək niyyətindədir. Bu kursu Mədəniyyət Nazirliyi və ARKA-nın iştirakı və dəstəyi ilə keçirməyi təklif edirik.

Bundan əlavə, Sizdən xahiş edirik ki, Azərbaycan Animasiya Assosiasiyasının daha uğurlu fəaliyyətini təmin etmək məqsədi ilə Animasiya evinə müxtəlif avadnlıqların (proyektor, ekran, kompüterlər və s.) alınmasına və ofisin icarə haqqının ödənilməsinə köməklik göstərəsiniz.

İkinci məsələ – Məsud Pənahi və Elçin Axundova Azərbaycan Respublikası Prezidentinin fərdi təqaüdünün ayrılması

20.12.2022-ci il və 21.08.2023-cü il tarixlərində Mədəniyyət Nazirliyinə və 21.07.2024-cü il tarixində Azərbaycan Respublikası Prezidentinin Administrasiyasına Azərbaycan mədəniyyətinə əvəzsiz töhfələr verən, milyonlarla uşaqları maarifləndirən, Azərbaycan animasiya sənətinin inkişafında möhtəşəm rolu olan, “Tıq-Tıq xanım” və “Cırtdan” tanınmış animasiya filmlərində çalışan, 1-ci və 2-ci Qarabağ müharibələri, Xocalı soyqırımı mövzusunda animasiya filmləri (“Narqız”, “Sükütun pozulması” “Güzgü”, “Cavanşir”, “Qızıl”) yaradan ustad sənətkarlarımız Məsud Pənahi və Elçin Axundova Azərbaycan Respublikası Prezidentinin fərdi təqaüdünün ayrılmasına dair məktublar ünvanlamışıq və əfsuslar olsun ki, indiyə kimi heç bir cavab almamışıq. Mədəniyyət Nazirliyi və ARKA-ya rəhbərlik edən nüfuzlu şəxslər kimi, Sizdən səlahiyyətləriniz çərçivəsində Məsud Pənahi və Elçin Axundova Azərbaycan Respublikası Prezidentinin fərdi təqaüdünün ayrılması məsələsində köməklik göstərməyinizi xahiş edirik.

Hörmətlə,

Rəşid Ağamalıyev

Azərbaycan Animasiya Assosiasiyasının sədri

Elçin Hami Axundov

Azərbaycan Animasiya Assosiasiyasının İdarə Heyətinin üzvü

Nəzrin Ağamalıyeva

Azərbaycan Animasiya Assosiasiyasının İdarə Heyətinin üzvü

Məsud Pənahi