Rəşid Ağamalıyev ADMİU tələbələri ilə görüşüb
Dekabrın 5-də Azərbaycan Animasiya Assosiasiyasının sədri, rejissor və prodüser Rəşid Ağamalıyev Azərbaycan Dövlət Mədəniyyət və İncəsənət Universitetində (ADMİU) tələbələrlə görüş keçirib. Tədbirin məqsədi animasiya sənətinə marağı artırmaq, gəncləri bu sahəyə cəlb etmək və onların yaradıcılıq potensialının inkişafına dəstək göstərmək olub.
Görüş zamanı Rəşid Ağamalıyev tələbələr üçün təcrübə proqramlarının xüsusi əhəmiyyət daşıdığını vurğulayıb. O qeyd edib ki, animasiya kimi sürətlə inkişaf edən sahədə gənclərin yalnız nəzəri biliklərlə kifayətlənməsi mümkün deyil və real istehsal prosesinə cəlb olunmaları, peşəkar komandalarda çalışma təcrübəsi qazanmaları vacibdir.
Daha sonra tələbələrə Azərbaycan Animasiya Assosiasiyasının fəaliyyəti, həyata keçirdiyi layihələr və mövcud imkanlar barədə ətraflı məlumat təqdim olunub. Tələbələr ANİMAFİLM Beynəlxalq Animasiya Festivalı, ANİMAFİLM Məktəbi, “Animasiya Evi” layihəsi, müxtəlif təlim və ustad dərsləri, beynəlxalq tərəfdaşlıqlar və animasiya kataloqları kimi təşəbbüslərlə tanış olublar.
Rəşid Ağamalıyev, həmçinin “Hadis” və “Narqız” animasiya filmlərinin yaradılma prosesi və beynəlxalq uğurlarından danışıb, hazırda studiyada üzərində işlənən “İsi və Piti”, “Eyni yağışın altında” və “Oyun” kimi yeni layihələri təqdim edib.
Tədbirdə, həmçinin 2-ci ATA – Türk Animasiya Festivalı çərçivəsində keçiriləcək nümayişlər barədə məlumat verilib. Qeyd olunub ki, dekabrın 6-da saat 10:30-da Nizami Kino Mərkəzində “Bum-bum” filminin təqdimatı, dekabrın 7-də saat 10:30-da “Yer və Ay” animasiya filminin premyerası, dekabrın 8-də isə saat 11:00-da 16-cı Bakı Beynəlxalq Film Festivalı çərçivəsində “Narqız” animasiya filminin nümayişi baş tutacaq. Bu tədbirlərin yerli və beynəlxalq auditoriyada Azərbaycan animasiyasına marağın artırılmasına mühüm töhfə verdiyi qeyd olunub.
Görüşdə tələbələr animasiya sahəsinə dair suallarına cavab alıb və real nümunələr əsasında mövzu üzrə biliklərini genişləndiriblər. Sonda Rəşid Ağamalıyev gəncləri təcrübə proqramlarında fəal iştirak etməyə və animasiya sahəsində öz yaradıcılıqlarını inkişaf etdirməyə çağırıb.
