“Yulaf dönərgə” (Porridge Monster) Ştutqart Beynəlxalq Animasiya Filmləri Festivalında

Gözəl bir xəbəri sizinlə bölüşürük!

Azərbaycanla birgə həyata keçirilən ilk beynəlxalq animasiya layihəsi olan “Yulaf dönərgə” (Porridge Monster) qısametrajlı animasiya filmi 5-10 May 2026-ci tarixlərində keçiriləcək 33- cü Ştutqart Beynəlxalq Animasiya Filmləri Festivalının (Stuttgart International Festival of Animated Film) «Uşaqlar Üçün Oyunlar» (Tricks For Kids Competition) müsabiqə bölümünə seçilib və festival çərçivəsində nümayiş olunacaq.

Stop motion, plastilin və 3D texnikalarından istifadə olunaraq yaradılmış “Yulaf dönərgə” filmi səhər yeməyi zamanı valideynləri arasında baş verən mübahisə zəminində uşaqda yaranan mürəkkəb emosiyalar haqqında duyğusal animasiya filmidir.

Filmin rejissoru polşalı rejissor Izabela Plucińska, ssenari müəllifi Justyna Celeda, rəssamı Karolina Gołębiowska, bəstəkarı isə Azər Hacıəsgərlidir. Filmi Maria Dąbrowska, Hüsniyyə Mürvətova, Maja Plucińska və Firdovsi A. Nəbiyev səsləndiriblər. Səs rejissorluğu Nadir Mahmudov, montaj Piotr Krygiel, titr dizaynı Rəsul Həsənə aiddir.

Polşa, Almaniya və Azərbaycanın istehsalçısı olaraq çıxış etdiyi layihədə prodüser kimi müvafiq şəkildə Paulina Ratajczak (“Las Sztuki Foundation”), Karsten Matern (“Wait a Second!”), Rəşid Ağamalıyev (“PERİ FİLM”) təmsil olunur. 

Film Polşa Kino İnstitutu, FFA – Kino Dəstək Fondu, BKM – Federal Hökumətin Mədəniyyət və Media üzrə Müvəkkili, ARKA – Azərbaycan Respublikası Kino Agentliyi, “ANİMAFİLM” Studiyası və “Pomerania Film” Qərbi Pomeraniya Kino Fondu tərəfindən birgə maliyyələşdirilmişdir. Film, həmçinin Qərbi Pomeraniya vilayəti Marşal İdarəsi, Koşalin şəhəri və Şetsin şəhəri tərəfindən birgə maliyyələşdirilmişdir.

Layihənin distribüteri Bear With Me Distribution, strateji partnyor Akademia Sztuki w Szczecinie.