Rejissor, rəssam, animator, ssenari müəllifi, yazıçı

Tərcümeyi hal:

Məsud Pənahi 10 yanvar 1943-cü ildə İranın Zəncan şəhərində doğulub. Yazıçı və şair Abbas Pənahi Makulu onun atası olub. 1946-ci ildə Pənahi ailəsi ilə Bakıya köçüb.

Pənahi 1966-cı ildə Əzim Əzimzadə adına Rəssamlıq Məktəbini, 1972-ci ildə isə Ümumittifaq Dövlət Kinematoqrafiya İnstitutunun (ÜDKİ) rəssamlıq fakültəsini və ÜDKİ-nin nəzdindəki animasiya üzrə quruluşçu-rejissor kurslarını bitirib. Məsud Pənahi animasiya kinosunun rejissorlarından İvan İvanov və Fyodr Xitrukdan dərs alıb.

1973-cü ildən 1979-cu ilə kimi Cəfər Cabbarlı adına “Azərbaycanfilm” kinostudiyasında animasiya filmlərinin rejissoru və rəssamı kimi çalışıb. Həmin illər ərzində bir neçə animasiya kursları təşkil etmiş, onlarla animasiya mütəxəssisi yetişdirmişdir.

1974-cü ildə Bakıda keçirilən VII Ümumittifaq festivalında “Bulud niyə ağlayır” multfilminə görə 1-ci mükafata layiq görülüb. 1979-cu ildə isə Aşqabadda keçirilən XII Ümumittifaq kino festivalında “Qız qalası əfsanəsi” multfilminə görə iştirak diplomu ilə təltif edilib.

1979-cu ildən Almaniyada yaşayır. Berlin Mərkəzi Telestudiyasında və müxtəlif animasiya studiyaları nəzdində 60-a yaxın animasiya filmlərinin çəkilişlərində iştirak edib. M. Pənahinin son işlərindən biri Berlindəki Azərbaycan diasporasının dəstəyi ilə 2012-ci ildə çəkilmiş̧ və Xocalı şəhərində baş vermiş̧ faciədən bəhs edən “Sükutun pozulması” (“Zerstörter Friede”) animasiya filmidir.

2018-ci ildə Məsud Pənahi 1-ci ANİMAFİLM Beynəlxalq Animasiya Festivalının “Azərbaycan animasiyasına verdiyi töhfəyə görə” “Qızıl qayıq” mükafatı ilə təltif olunub. 2019-cu ildə həmin festivalın beynəlxalq münsiflər heyətinin sədri olub.

2020-ci ildə Almaniyanın Berlin şəhərində Məsud Pənahinin “Rezin xoruz” adlı avtobioqrafik kitabı nəşr olunub. 2022-ci ildən Azərbaycan Animasiya Assosiasiyasının üzvüdür.

Linklər:

Məsud Pənahi ilə müsahibə – YouTube

Məsud Pənahi ilə müsahibə – “BAKU” jurnalı (rus dilində)

Filmoqrafiya (Azərbaycanda çəkilən filmlər):

  1. “Bulud niyə ağlayır?” (1973) – rejissor, quruluşçu rəssam, ssenari müəllifi
  2. “Pıspısa xanım və Siçan bəy” (1974) — rejissor, quruluşçu rəssam
  3. “Günlərin bir günündə…” (1975) — rejissor, quruluşçu rəssam, ssenari müəllifi
  4. “Pəncə… Qulaq… Palaz… Tikan…” (1976) — rejissor, quruluşçu rəssam
  5. “Dınqıl sazım, dınqıl” (1976) — rejissor, quruluşçu rəssam
  6. “Şah və xidmətçi” (film, 1976) — quruluşçu rəssam
  7. “Xoruz” (film, 1977) — rejissor, quruluşçu rəssam, ssenari müəllifi
  8. “Qız qalası əfsanəsi” (film, 1978) — rejissor

Filmoqrafiya (Almaniyada çəkilən filmlər):

  1. “Ev” (1980, qısametrajlı animasiya filmi) – rejissor, quruluşçu rəssam
  2. “Mətbəx əşyalarının bəhsi” (1981-1982, animasiya seriyalı) – 6 seriyanın rejissoru
  3. “Ayaqqabı oğrusu” (1982, qısametrajlı animasiya filmi) – rejissor, quruluşçu rəssam
  4. “Zooparkda heyvanların mübahisəsi” (1982-1983, animasiya seriyalı) – 7 seriyanın rejissoru
  5. “Maks və Moris” (1983, animasiya seriyalı) – 7 seriyanın rejissoru və quruluşçu rəssamı
  6. “Xoruz döyüşü” (1984, qısametrajlı animasiya filmi) – rejissor, quruluşçu rəssamı, animator
  7. “Buludlu, mavi” (1984, ,qısametrajlı animasiya filmi) – rejissor, quruluşçu rəssam, animator
  8. “Şərq nağılları” (1985, animasiya seriyalı) – 3 seriyanın rejissoru və quruluşçu rəssamı
  9. “Görünməz papaq” (1987-1989, animasiya seriyalı) – 26 seriyanın rejissoru, quruluşçu rəssamı
  10. “Sonuncu alma” (1989, qısametrajlı animasiya filmi) – rejissor, quruluşçu rəssam
  11. “Şaxta babanın nəvəsi” (1989, qısametrajlı animasiya filmi) – rejissor, quruluşçu rəssam
  12. “Donky” (1993, animasiya seriyalı) – 1 seriyanın rejissoru, quruluşçu rəssam və animator
  13. “Üç muşketyor” (1994, qısametrajlı animasiya filmi) – rejissor
  14. “Tobias and His Lion” (1999, tammetrajlı animasiya filmi) – animator
  15. “The Little Polar Bear” (2001, tammetrajlı animasiya filmi) – animator  
  16. “The Little Polar Bear: Lars and the Little Tiger” (2002, tammetrajlı animasiya filmi) – animator, vizual effektlər
  17. “The Little Polar Bear: The Dream of Flying” (2003, tammetrajlı animasiya filmi) – animator, visual effektlər
  18. “The Little Polar Bear – Nanouk’s Rescue” (2003, tammetrajlı animasiya filmi) – animator, visual effektlər
  19. “The Little Polar Bear: A Visitor from the South Pole” (2004, tammetrajlı animasiya filmi) – animator, visual effektlər
  20. “Pozulmuş sülh” (2012, qısametrajlı animasiya filmi) – rejissor, quruluşçu rəssam