Rejissor, prodüser, ssenari müəllifi
Tərcümeyi hal:
Rəşid Eldar oğlu Ağamalıyev 1992-ci il oktyabrın 28-də anadan olub. 2015-ci ildə Hollandiyanın Utrext şəhərinin eyniadlı universitetində “Fəlsəfə” ixtisası üzrə təhsil alıb. 2017-ci ildə Çexiya Respublikasının Olomouts şəhərinin Palatski Universitetində “Kinoşünaslıq” və “İngilis dilinin filologiyası” ixtisasları üzrə bakalavr dərəcəsi alıb. 2018-ci ildə Praqada Səhnə Sənətləri akademiyasının Kino və Televiziya fakültəsində “Kinoprodüser” ixtisası üzrə kurs bitirib.
2018-ci ildə çap olunmuş “Azərbaycan animasiyası” kitabının həmmüəllifi və baş redaktorudur. 2018-ci ildə yaradılmış ANİMAFİLM Beynəlxalq Animasiya Festivalının təsisçisi və direktorudur. 2020-ci ildən ANİMAFİLM Studiyasının (“PERİ FİLM” MMC) direktorudur.
Prodüseri Rəşid Ağamalıyev olan “Hədis” qısametrajlı animasiya filmi Azərbaycan Türkü Hədis Nəcəfiyə həsr olunub. Filmin premyerası dünyanın ən böyük animasiya festivalı olan Annecy Beynəlxalq Animasiya Filmləri Festivalında olub. Film 40-dan çox beynəlxalq festivala (bu festivallardan yeddisi – Annecy, Busan, Animest və İzmir Oskar kvalifikasiyalı festivallardır), 9 mükafat qazanmışdır.
Hazırda Rəşid Ağamalıyev Azərbaycan Respublikası Kino Agentliyinin (ARKA) dəstəyi ilə “Narqız” (rejissor Məsud Pənahi) adlı yeni qısametrajlı animasiya filmi üzərində çalışır. “Narqız” filminin əsas maarifləndirici məqsədi işğaldan azad olunmuş ərazilərdə düşmənin basdırdığı mina sahələrinə diqqəti yönəltmək, minaların necə təhlükəli olduğunu uşaqların diqqətinə çatdırmaqdır.
Rəşid Ağamalıyev Azərbaycan Animasiya Assosiasiyasının təsisçilərindən biri və sədridir.
Linklər:
Filmoqrafiya:
- “Züleyxa ilə dialoqlar” (2019, qısametrajlı sənədli film) – rejissor, prodüser
- “Sara, hara?” (2021, qısametrajlı animasiya filmi) – icraçı prodüser
- “Hətta siçanlar da cənnətə aiddir” (2021, tammetrajlı animasiya filmi) – layihə meneceri
- “Hədis” (2023, qısametrajlı animasiya filmi) – prodüser
- “Narqız” (2024, qısametrajlı animasiya filmi. İstehsalda) – prodüser