Azərbaycan Qazaxıstanın “Altın Saka” festivalında təmsil olundu
16-18 iyun tarixlərində Qazaxıstanın Türkistan şəhərində “Altın Saka” III Beynəlxalq Animasiya filmləri festivalı keçirilib.
Türkdilli ölkələrin animasiya filmlərinin iştirak etdiyi festivalın müsabiqə proqramına 41 film seçilib. Müsabiqədə üç Azərbaycan animasiya filmi iştirak edib – “Araqçın” (2021, rej. Firəngiz Qurbanova), “Qarabağ nağılı” (2022, rej. Firəngiz Qurbanova) və “Tarix” (2022, rej. Ceyhun Türksoy).
“Altın Saka” festivalının münsiflər heyətində Qazaxıstan, Qırğızıstan, Özbəkistan, Türkiyə və Azərbaycandan olan kino mütəxəssisləri iştirak ediblər. Azərbaycanı münsiflər heyətində “Azərbaycanfilm” kinostudiyasının əməkdaşı, ADMİU-nun müəllimi, ssenarist Ramil Ələkbərov təmsil edib.
Münsiflər heyətinin dəyərləndirməsindən sonra qaliblər müəyyən olunub. Festivalın qalibləri arasında “OB film” studiyasının istehsalı olan “Tarix” animasiya filmi də var. “Tarix” filmi “Altın Saka” Festivalının üçüncülük mükafatına layiq görülüb.
Azərbaycan Respublikası Mədəniyyət Nazirliyinin dəstəyi ilə çəkilmiş “Tarix” filminin rejissoru Ceyhun Türksoy, bəstəkarı Şəmsi Tağıyev, ssenari müəllifi və prodüseri Orxan Behbiddir.
Qeyd edək ki, film məktəb gündəliyində qeyd olunan rayonlarımızın işğal tarixlərini heç cür əzbərləyə bilməyən oğlan haqqındadır. O, oyuncaqları ilə oynadıqdan sonra yuxuya gedir. Yuxuda qəhrəmanımızın oyuncaqları real hərbi texnikalara çevrilərək düşmənin üzərində zəfər çalır. Uşaq oyanır, gündəliyi açır və işğal tarixlərinin üstündən bir-bir qırmızı xətt çəkir.
Qeyd edək ki, “Tarix” filmi bundan öncə Bakıda keçirilən 5-ci ANIMAFILM Beynəlxalq Animasiya Festivalında, Hindistanda 19-cu “Aakruti-My Creation International Film Festival”ında (Quarter-Finalist), Filippində “Batangas Balisong Film Festival”ında (Finalist) və Xorvatiyada 14-cü “VAFI & RAFI – International Children and Youth Animation Film Festival”ında iştirak edib.
Mənbə:
“Azərbaycanfilm” kinostudiyası
“OB film” studiyası
