“Hədis” filmi daha iki festival müsabiqəsində
“Hədis” filmi daha iki festival müsabiqəsində
“Hədis” qısametrajlı animasiya filmi 2023-cü ilin 4-12 avqustunda keçiriləcək Kosovonun DokuFest Beynəlxalq Sənədli və Qısa Filmlər Festivalının(DokuFest International Documentary and Short Film Festival) “DokuKids” adlı müsabiqədənkənar proqramına daxil edilib. Festivalda “Hədis”in nümayişi avqustun 7-sində baş tutacaq.
Digər festival Estoniyanın Animist Tallinn Beynəlxalq Animasiya Festivalıdır (Animist Tallinn International Animation Festival). Festival 16-19 avqust, 2023-cü ildə keçiriləcək. “Hədis” festivalın Animadoc Focus on the “Middle East” müsabiqədənkənar proqramına daxil edilib.
ANIMAFILM Studio-nun çəkdiyi “Hədis” filmi simvolik olaraq qarğaların hökm sürdüyü ədalətsiz dünyada haqq-ədalət uğrunda mübarizə aparan gənc qız haqqındadır.
“Hədis” qısametrajlı animasiya filmi 2022-ci ilin sentyabrın 21-də İranda etiraz aksiyaları zamanı təhlükəsizlik qüvvələri tərəfindən qətlə yetirilmiş 22 yaşlı Azərbaycan Türkü Hədis Nəcəfiyə həsr olunub, İranda gender, etnik və mədəni ayrıseçkiliklə mübarizə aparanlara ithaf olunub.
Qeyd edək ki, bundan öncə “Hədis” filminin beynəlxalq premyerası dünyanın ən böyük animasiya festivalı olan Fransanın Annecy Beynəlxalq Animasiya Film Festivalında baş tutub. Film, həmçinin, Cənubi Koreyanın 25-ci Bucheon Beynəlxalq Animasiya Festivalının əsas müsabiqə proqramına daxil edilib.
Filmin rejissoru Nəzrin Ağamalıyeva, prodüseri Rəşid Ağamalıyev, ssenari müəllifləri İsmayıl İman və Nəzrin Ağamalıyeva, məsləhətçisi Məsud Pənahi, aparıcı animatoru Andrea Szelesovádır, montajçı Jorge Sánchez Calderón, bəstəkar Ondřej Zavadil, səsləndirən Zöhrə Kərimi, redaktoru Rafiq Məmmədlidir. Filmin partiturasında Azərbaycanın məşhur musiqiçisi Sevda Ələkbərzadənin musiqisi səslənir.
“ANİMAFİLM Studio” animasiya studiyasının istehsal etdiyi “Hədis” filmi “Şimali Kaliforniya Azərbaycan Mədəniyyəti Mərkəzi”nin maliyyə və ideya dəstəyilə çəkilib. Azərbaycan Animasiya Assosiasiyası, “Əkinçi” platforması və “Skwigly” online animasiya jurnalı filmə media dəstəyi verib.