Azərbaycan Animasiya Assosiasiyası “Tashkent Game & Animation Fest 2024” Beynəlxalq Festivalında

3-4 iyun tarixlərində Özbəkistan Rəqəmsal Texnologiyalar Nazirliyinin dəstəyi ilə Daşkənd şəhərində “Tashkent Game & Animation Fest 2024” Beynəlxalq Festivalı keçirilib. Strateji əhəmiyyət daşıyan tədbirin məqsədi Özbəkistanda innovativ, kreativ iqtisadiyyatı inkişaf etdirmək, gənc nəsli yerli və beynəlxalq səviyyədə oyun və animasiya sənayesi sahəsində fəaliyyətə cəlb etməkdir.

Festivalda Azərbaycan Animasiya Assosiasiyasının üzvləri Rəşid Ağamalıyev, Nəzrin Ağamalıyeva, Oktai İusibov, Assosiasiyanın üzvü olan “Dynamic Box” şirkətinin həmtəsisçisi Yaqub Mehdiyev iştirak ediblər.

Festival çərçivəsində qeyd olunan Animation Day (Animasiya günü) maraqlı tədbirlərlə yadda qalıb: “Özbəkistan animasiya studiyaların təqdimatı”, Matthew Lyon-un (Kanada) “Personal growth in the creative profession” (“Yaradıcı peşədə fərdi inkişaf”) məruzəsi, Iuriy Stepanovun (Kanada) “The work of an animation studio in Canada” (“Kanadada animasiya studiyasında iş”), Pavel Potyoxinin “How to pitch a project” (“Layihəni necə təqdim etməli”), Michael Morrisin (ABŞ) “Storyboard and Virtual Studio” (“Storyboard və Virtual Studiya”) və Konstantin Bronzitin (Rusiya) məruzələri,  “Co-production” animasiya layihələrinin təqdimatı və Türk Animasiya Assosiasiyanın (ATA) təqdimatı xüsusilə diqqət çəkib.

Festivalda Türk Animasiya Assosiasiyanın (ATA) sədri Oktai İusibov (Finlandiya, Azərbaycan) təqdimat zamanı Assosiasiyanın fəaliyyəti barədə danışıb. O, yüksək səviyyədə təşkil olunan festival münasibətilə tamaşaçıları və təşkilatçıları təbrik edib, təşəkkürünü bildirib, türk animasiyasına uğurlar arzulayıb. Assosiasiyanın işçi qrupunun üzvləri Kayrat Mukanov (Qazaxıstan), Rəşid Ağamalıyev (Azərbaycan), Azizbek Muhamedov (Özbəkistan), Pavel Kim (Özbəkistan) və başqalarının çıxışları festivalın qonaqları tərəfindən böyük rəğbətlə qarşılanıb.

“Co-production” animasiya layihələrinin təqdimatında isə “Sehrli xalça” (Azərbaycan), “Dar vaxtda” (Azərbaycan), “Elementary” (Özbəkistan, Kanada), “Hidari” (Yaponiya) və “Ağ bulud” (Rusiya) tədim edilib.

Festival səmərəli görüşlər, yeni ideyalar, tərəfdaşlıq əlaqələrinin qurulması və təcrübə mübadiləsi baxımından maraqlı məqamlarla zəngin olub.