ANİMAFİLM Pitçinq Müsabiqəsinin seçilmiş layihələri açıqlanıb
8-ci ANİMAFİLM Beynəlxalq Animasiya Festivalı çərçivəsində keçiriləcək 1-ci ANİMAFİLM Pitçinq Müsabiqəsinə seçilmiş layihələr açıqlanıb. Pitçinq 2025-ci il, 5 sentyabr, saat 14:30-da Nizami Kino Mərkəzində keçiriləcək. Pitçinq üçün biletləri “Iticket” platformasından əldə etmək mümkündür.
Müsabiqə “Azərbaycan Animasiya Assosiasiyası” İctimai Birliyinin təşkilatçılığı, Azərbaycan Respublikası Mədəniyyət Nazirliyi, Azərbaycan Respublikasının Kino Agentliyi (ARKA), CEE Animation, ANİMAFİLM Studiyası və Dynamic Box Studio-nun dəstəyi ilə keçirilir. Yarışmanın məqsədi Azərbaycanın animasiya layihələrini inkişaf, pre-prodakşn və ya prodakşn mərhələlərində dəstəkləməkdir.
“ANİMAFİLM Pitçinq Müsabiqəsinin ilk buraxılışı istedadlı animasiya müəllifləri bir araya gətirib. Bu layihələri təqdim etməkdən qürur duyuruq və onların bu yolda qazanacaqları uğurları səbirsizliklə gözləyirik.” – deyə ANİMAFİLM Beynəlxalq Animasiya Festivalının direktoru Rəşid Ağamalıyev bildirib.
Təşkilatçılar tərəfindən bütün müraciətlər nəzərdən keçirildikdən sonra aşağıdakı layihələr seçilib:
- “Hasarın o tayı” (TV serialı). Rejissor: Şahid İsmayılov
- “Komble” (TV serialı). Rejissorlar Petre Tomadze, Mehriban Əliyeva
- “Balaca Simurq” (qısametrajlı film). Rejissor Nəzrin Axundova
- “Xizək” (qısametrajlı film). Rejissor Polina Knyazeva, prodüser Firəngiz Bağırova
Münsiflər heyəti:
- Nəzrin Ağamalıyeva – animasiya rejissoru, “ANİMAFİLM Studiyanın” art direktoru
- Şahin Əliyev – “Dynamic Box Studio”nun həmtəsisçisi, prodüser
Mükafatlar:
- Azərbaycan Respublikası Mədəniyyət Nazirliyi və ARKA-nın Mükafatı – “Annecy Festivalına Səyahət”
- ANİMAFİLM Studiyası Mükafatı – 500 AZN
- Dynamic Box Studio Mükafatı – 500 AZN
Bundan əlavə, qalib layihələr CEE Animation platformasında dərc olunacaq və istehsal dəstəyi üçün Azərbaycan Respublikası Kino Agentliyinə (ARKA) tövsiyə ediləcək.