“Animacenter” özəl animasiya mərkəzinin istehsalı olan “Balaş” animasiya serialı
“Animacenter” özəl animasiya mərkəzinin istehsalı olan “Balaş” animasiya serialı müasir milli kinosənayesində xüsusi yer tutur. Artıq 30-dan çox bölümü işıq üzü görmüş bu serialın əsas məqsədi uşaqlara maraqlı macəralar vasitəsilə faydalı məlumatlar vermək, gündəlik həyatda qarşılaşdıqları sualları və problemləri sadə, əyləncəli və yumoristik dildə izah etməkdir.
Layihənin ssenari müəllifi Reyhan Yusifqızı, rejissor və animatoru Sultan Abbasbəyli, 3D modelçisi Simran Ağayev, səs rejissoru isə Mehman Nadirovdur. Rəhim Rəhimov, Gülnarə Zülalova və Cəmilə Allahverdiyevanın səsləndirdiyi obrazlar vasitəsilə həm milli, həm də müasir dəyərlər, tariximiz və yeni texnologiyalar uşaq auditoriyasına aşılanır. Serialın mərkəzində hər şeylə maraqlanan, xeyirxah və bir qədər sadəlövh olan baş qəhrəman Balaş və onun dostları dayanır. Obrazlar arasında çox kitab oxuyan və bilikli Teymur, diribaşlığı və hazırcavablığı ilə seçilən Zümrüd, hadisələrə rəng qatan tənbəl və gülməli “Uzun və Kök” cütlüyü xüsusi rəğbət qazanmışdır. Uşaqların saysız-hesabsız sualları isə serialda Balaşın babası və nənəsinin dili ilə sadə şəkildə cavablandırılır.
Hazırda “Arb Günəş” kanalı ilə yanaşı YouTube platformasında da yayımlanan “Balaş” serialı, yerli izləyicilərin böyük marağına səbəb olmaqla bu növ maarifləndirici layihələrə olan böyük tələbatı bir daha sübut edir.